Le galo
Le galo qhi qe c’ét don ?
Le galo ét le parlement roman de Haote-Bertègn. La q’ét un parlement d’oïl qi s’orine du latin vulier (préchérs romans d’eune maitië Ahaot de la France), come le normand, l’anjevin ou le parlanje.
Durant berouée, le galo fut dejetë e maonomë o “patouéz” q’ét pouint empllayë den le demaines des langues a caoze q’i done a sonjer den eune yerarchie entortue entr les parlements, qe n-i araet les sienes q’ont d’étr nomées de méme e les “préchérs de payiz” q’ont pouint le dret d’étr nomës de méme. Les langaijists dizent yeûs pus fôt “parlements” e “caozérs” (gâreries du payiz des parlements-la).
Le mot “galo” s’orine du berton gall, qi veut dire le hor-venu, le sien qi ne caoze pouint le berton.
Le galo e le berton sont caozës de domë en Bertègn istoriqe depés le Më-Âje. En treûe des merqes du galo depés les XIIe-XIIIe siecls den le Livre des Manières d’Etienne de Fougères (XIIe siecl) ou ben core den la Chanson d’Aiquin (XIIIe siecl).
Le berton qi taet caozë bétôt diq’a Rene e Nante, devers le IXe siecl, dechalit petit a la fai a galerne den les siecls qi sieuvite e le galo pezit pus fôt en Haote-Bertègn.
Diq’ao XIXe siecl, le galo reste un parlement de goule ren qe de goule, den eune societë q’ét ben rurale. Ét durant la pâssée-la q’i qemancera a y’étr rasserrë o les folklorists pés a s’ecri den les gazettes. I sera vrai ben bllâmë a l’ecole ôyou qe ren qe le françaez avaet bon lôz.
Le galo astoure
Astoure, le galo ét caozë en Ile-e-Vilaine, a soulaire des Côtes d’Ahaot e du Morbihan, e etout en Laire-de-Bertègn, d’aprés eune line enjinée qi se n-n aleraet dede Ploua diq’a la Më-ile de Rhuys. Le “separt langaijier-la” s’emouvit den le temp, dede la n-i a core des iliaos en Haote-Bertègn ôyou qe le berton ét core caozë.
En 2004, le Consail Rejiona de Bertègn erqeneût le galo come parlement de Bertègn, parai come le berton. La q’ét la permiere arguerouée de payiz a lever eune politiqe langaijiere q’ét forcie en 2012 o un pllan benvoulant pour erdoner e parchomer nôs parlements rejionaos.
L’Institut du Galo fut levë en 2017 dede o le voulouèr des consorteries du payiz e de la Rejion Bertègn. Ét li qi mene la chârte pour parlever le galo “du Galo, dame Yan, dame Vére !” q’a devocion de mettr ao roule des fezeries pour le parlement, pour q’i seraet caozë e vayabl den la vie du tous-les-jous des Bertons e des Bertones. Ole ét pour les aguerouées de payiz e les consorteries pés etout pour les enterprinzes.
Le Consail Rejiona qemande en 2024 eune encerche aoprés de l’institut TMO Région su l’uzaije du berton e du galo en Bertègn. Celle-ci nous apprend que le nombre de locuteurs de langue gallèse est aujourd’hui estimé à près de 132 000 personnes, soit 3,3 % de la population.
La siene-la nous aprint qe n-i a bétôt 132 000 caoze-galo ao jou d’anet, la q’erperzente 3,3 % des Bertones e des Bertons.
Depés 2009, le galo ét reqenû par l’Unesco come “parlement vrai su l’en-pére”.
Pour survéqhi e se parchomer, le galo a vrai afére d’étr rasserrë (l’ecrit e de goule) e d’étr erdonë (ensegnement, media, espectacl). Des consorteries q’ouvraijent a parlever, fére aqeneûtr e fére vivr le galo, i n-n maintiunes. En-méle les sienes-la, n-i a Qerouézée le galo en Côtes d‘Ahaot, le CAC Sud 22, Chubri, la Granjagoul…
En payiz de Saint-Berieu, des arivâs pour oui e aprindr le galo i n-n a maintiuns : véprées, vaillées, reperzentézons de teyâtr, liries publliqes, estaijes ou ben coure donées de radios…
