Feurmiñ hon diskouezadegoù fotoioù
Bep bloaz e sav Telenn un diskouezadeg luc’hskeudennoù, da-geñver mizvezh yezhoù Breizh, a vez diskouezet war porzh al lege. 30 pannel e dibond a vez e pep hini anezhe. Skrivet int e teir yezh : brezhoneg, gallaoueg ha galleg.
Mont e darempred gant Telenn evit gouzout muioc’h war an divizoù feurmiñ.
Les gens du port - Tud ar porzh - Le monde du port de mé
Lod anezho a zo martolodel, pesketaerien pe c’hoazh bagerreien evit o flijadur. Lod all a zo koñversanted, artizaned, gopridi, hanterourien sevenadurel, baleerien war o amzer vak pe sportourien. ne vern ! En em gavout a reont amañ, an holl anezho, pe e vefent o labourat pe o lojañ en-dro d’ar porzh, pe e teufent amañ evit o flijadur nemetken. Andorennet-klok eo porzh al Lege e deun ur saonenn wezennek, e genoù ar Goued – un aber eo, a lavaro lod. Un harz naturel eo, a-bell gozh, etre Pentevr ha Gouelo, hag amañ e talm kreñvoc’h kalon ekonomikel bro Sant-Brieg.
Hogen ar porzh zo ivez ul lec’h istorel : amañ e touaras, 1500 vloaz ‘zo, ar manac’h Brieg, an hini a ziazezas ar gêr a zo bet anvet dioutañ ; ac’halen ec’h ambarke gwechall, tre betek an XIXvet kantved, paotred an Douar-Nevez, hag an Islanded, hag amañ eo e tiazezas ar greantelour Lucien Rosengart al labouradeg a vez oberiet enni obuzioù ar Brezel Bras, adal 19016.
Er bloavezhioù diwezhañ-mañ ez eo bet kempennet a-nevez ar porzh, ha renevezet a-grenn, ha n’eus ket da vezañ souezhet eta ma sach davetañ, a-benn bremañ, an dud hag an oberientezhioù, Telenn, kevredad sevenadur Bro Sant-Brieg evit sevenadur Breizh, a zo bet fellet dezhañ enoriñ ar porzh ha dougen bri d’ar re a zarempred anezhañ ingal. Gouelennet ez eus bet digant al luc’hskeudenner Judicaël de la Ferrière poltrediñ anezho.
Passeurs de mots, passeurs de vie
Treuzkas ar yezhoù, treuzkas ar vuhez
Pâssous de mots, pâssous de vie
Emañ ar brezhoneg hag ar galloeg e-touesk an 3000 yezh renablet dre ar bed. An div yezh-se, herezh an holl Vretoned, a aparchant war ar memes tro ouzh glad sevenadurel an denelezh. Yezhoù ar bobl, bet minorelaet ha dibrizet zoken, ez adkavont bremañ o gwir blas e kalon ar Vretoned.
Goude an dismegañs hag an ankounac’h, setu deuet a-benn bremañ mare ar c’hoant-gouzout hag an adperc’hennañ. An dispac’h peoc’hus-se en deus e harozed : kelennerien, deskarded, kanerien, sonerien, skrivagnerien, barzhed
Telenn, kevread ar c’hevredigezhioù sevenadurel breizhek e bro Sant-Brieg, he deus faotet dezhi rentañ enor d’an dud-se. Setu perak ez eus bet kinniget da Swan ha Judicaël de la Ferrière, daou luc’hskeudenner donezonet-kaer eus Sant-Brieg, poltrediñ ar re a gemer perzh, dre amañ, e treuzkas yezhoù Breizh.
Dre ar poltredoù hiniennel pe a-stroll a vo kinniget amañ deoc’h, e c’hellot ober gwelloc’h anaoudegezh gant lod eus an dreizherien-se ; a-drugarez dezho ha d’o obererezh sevenadurel, e chom ar brezhoneg hag ar galloeg yezhoù bev-mat en hor XXIvet kantved.
